ایودھیا رام مندر چندہ چوری کیس میں سپریم کورٹ نے اہم سماعت کرتے ہوئے اتر پردیش حکومت، مرکزی حکومت اور شری رام جنم بھومی تیرتھ ٹرسٹ کو نوٹس جاری کیا ہے۔ چیف جسٹس سوریا کانت کی سربراہی میں قائم بنچ نے ریاستی حکومت کی تشکیل کردہ اسپیشل انویسٹی گیشن ٹیم (SIT) سے اب تک کی جانچ کی تفصیلی اسٹیٹس رپورٹ طلب کی ہے۔

عدالت نے ہدایت دی کہ رپورٹ میں تفتیشی افسران کے نام، SIT کی تشکیل، اس کے ارکان اور تحقیقات کی پیش رفت کی مکمل معلومات دی جائیں۔ عدالت نے CCTV فوٹیج، DVR اور دیگر الیکٹرانک شواہد محفوظ رکھنے کا بھی حکم دیا تاکہ کسی بھی ثبوت سے چھیڑ چھاڑ نہ ہو سکے۔

سالیسٹر جنرل تشار مہتا نے عدالت کو بتایا کہ حکومت رپورٹ سیل بند لفافے میں پیش کرے گی، تاہم عدالت نے واضح کیا کہ رپورٹ میں SIT کی مکمل ساخت اور اس کے افسران کی تفصیلات شامل ہونی چاہئیں۔ اگلی سماعت 20 جولائی 2026 کو ہوگی۔

سپریم کورٹ اس معاملے میں چار مختلف درخواستوں پر سماعت کر رہی ہے جن میں CBI جانچ، مالیاتی ریکارڈ کا CAG اور فرانزک آڈٹ، بینک اور UPI ریکارڈ محفوظ رکھنے، بڑے مالی فیصلوں پر روک اور ٹرسٹ کے مالیاتی نظام میں شفافیت لانے کا مطالبہ کیا گیا ہے۔

دوسری جانب شری رام جنم بھومی تیرتھ ٹرسٹ نے چیف ایگزیکٹو آفیسر (CEO) کے عہدے کے لیے درخواستیں طلب کی ہیں۔ امیدوار کی عمر 50 سے 70 سال، تعلیمی قابلیت گریجویشن اور کم از کم 20 سال کا انتظامی تجربہ لازمی قرار دیا گیا ہے۔ درخواست جمع کرانے کی آخری تاریخ 18 جولائی 2026 مقرر کی گئی ہے۔