اقوام متحدہ کے فیکٹ فائنڈنگ مشن نے اپنی تازہ رپورٹ میں کہا ہے کہ سوڈان کے دارفور کے شہر الفاشر میں ریپڈ سپورٹ فورسز (RSF) نے نسل کشی کا ارتکاب کیا۔ رپورٹ کے مطابق تنظیم نے شہریوں کے خلاف منظم انداز میں بڑے پیمانے پر قتل، اجتماعی زیادتی اور بھوک کو جنگی ہتھیار کے طور پر استعمال کیا۔ تحقیق میں بتایا گیا ہے کہ الفاشر کا طویل محاصرہ کر کے امدادی سامان کی فراہمی روکی گئی، خوراک کی پیداوار کو نشانہ بنایا گیا اور شہریوں کو جان بوجھ کر بھوک کا شکار بنایا گیا۔ کئی متاثرین نے بتایا کہ ان کے اہلِ خانہ کے قتل کے بعد انہی کمروں میں ان کے ساتھ اجتماعی زیادتی کی گئی۔ اقوام متحدہ کے ہائی کمشنر برائے انسانی حقوق وولکر ترک نے خبردار کیا ہے کہ اب شمالی کردفان کے شہر الابیض میں بھی سنگین انسانی بحران پیدا ہو رہا ہے، جہاں ماورائے عدالت قتل، اغوا، تشدد اور جنسی تشدد کے واقعات رپورٹ ہو رہے ہیں۔ دوسری جانب RSF نے تمام الزامات مسترد کرتے ہوئے انہیں اپنے مخالفین کا پروپیگنڈا قرار دیا ہے، جبکہ اقوام متحدہ نے عالمی برادری سے فوری اقدامات کرنے کی اپیل کی ہے تاکہ مزید انسانی المیوں کو روکا جا سکے۔