کولمبیا میں دائیں بازو کے امیدوار ڈی لا ایسپریلا کی قریبی فتح

کولمبیا کے صدارتی انتخابات کے دوسرے مرحلے میں دائیں بازو سے تعلق رکھنے والے وکیل ایبلارڈو ڈی لا ایسپریلا نے انتہائی قریبی مقابلے کے بعد کامیابی حاصل کر لی ہے۔ ابتدائی ووٹوں کی گنتی کے مطابق انہوں نے 49.7 فیصد ووٹ حاصل کیے جبکہ ان کے حریف بائیں بازو کے سینیٹر ایوان سیپیڈا کو 48.7 فیصد ووٹ ملے۔

ایوان سیپیڈا نے موجودہ صدر گستاوو پیٹرو کی پالیسیوں کو جاری رکھنے، سماجی منصوبوں کو آگے بڑھانے اور مسلح گروہوں کے ساتھ امن مذاکرات برقرار رکھنے کا وعدہ کیا تھا۔ دوسری جانب ڈی لا ایسپریلا نے ملک کی معاشی اور سیکیورٹی مشکلات کا ذمہ دار موجودہ حکومت کو قرار دیتے ہوئے باغی گروہوں کے ساتھ مذاکرات ختم کرنے، تیل و گیس کے شعبے کو فروغ دینے اور ٹیکسوں میں کمی لانے کا اعلان کیا تھا۔

کامیابی کے بعد اپنے حامیوں سے خطاب کرتے ہوئے ڈی لا ایسپریلا نے کہا کہ وہ تمام کولمبین شہریوں کے صدر ہوں گے اور ملک کو نئی سمت دینے کے لیے کام کریں گے۔

ان کی فتح کو کولمبیا میں دائیں بازو کی سیاست کی واپسی کے طور پر دیکھا جا رہا ہے۔ تاہم انتخابی مقابلہ انتہائی سخت رہا، جس کے باعث نئی حکومت کو منقسم پارلیمان کے ساتھ مل کر کام کرنا پڑ سکتا ہے۔

انتخابات میں تقریباً 4 کروڑ 14 لاکھ رجسٹرڈ ووٹروں میں سے 2 کروڑ 63 لاکھ سے زائد افراد نے حقِ رائے دہی استعمال کیا۔ سیکیورٹی، منشیات کی اسمگلنگ، بھتہ خوری اور جرائم جیسے مسائل ووٹروں کے اہم خدشات میں شامل رہے۔

ایوان سیپیڈا نے حتمی نتائج کے اعلان تک انتظار کرنے کا عندیہ دیتے ہوئے کہا کہ ان کی انتخابی ٹیم ہزاروں پولنگ اسٹیشنوں کے نتائج کا جائزہ لینے کا مطالبہ کر رہی ہے اور وہ جمہوری عمل کا احترام کرتے ہوئے آئندہ کا لائحہ عمل طے کریں گے۔