اسٹارمر پر دباؤ میں اضافہ، وزرا مستعفی، حریف متحرک

برطانوی وزیر اعظم کیئر اسٹارمر اپنی قیادت کے سب سے بڑے سیاسی بحرانوں میں سے ایک کا سامنا کر رہے ہیں، کیونکہ مقامی انتخابات میں بھاری شکست اور پارٹی کے اندر بڑھتی بے چینی کے بعد لیبر پارٹی کے ارکان پارلیمنٹ کی بڑھتی تعداد ان سے استعفے کا مطالبہ کر رہی ہے۔

دباؤ کے باوجود اسٹارمر نے اصرار کیا ہے کہ وہ حکومت جاری رکھیں گے اور معیشت کی بہتری، اسپتالوں میں انتظار کی فہرستیں کم کرنے اور قومی سلامتی مضبوط بنانے کے لیے اصلاحات پر عمل کریں گے۔

وزیر اعظم نے بدھ کی صبح ڈاؤننگ اسٹریٹ میں وزیر صحت ویس اسٹریٹنگ سے مختصر ملاقات کی۔ اسٹریٹنگ کو قیادت کے ممکنہ امیدوار کے طور پر دیکھا جا رہا ہے، اور وہ تقریباً 20 منٹ بعد صحافیوں سے بات کیے بغیر روانہ ہو گئے۔

یہ ملاقات ایسے وقت ہوئی جب اسٹارمر کے مستقبل کے حوالے سے شدید قیاس آرائیاں جاری ہیں۔ اطلاعات کے مطابق 80 سے زائد لیبر ارکان پارلیمنٹ ان سے مستعفی ہونے کا مطالبہ کر چکے ہیں۔ حالیہ دنوں میں کئی جونیئر وزرا بھی احتجاجاً مستعفی ہو گئے ہیں، جس سے حکمران جماعت کے اندر بحران مزید گہرا ہو گیا ہے۔

استعفیٰ دینے والوں میں جیس فلپس، الیکس ڈیویز جونز، زبیر احمد اور میاٹا فانبلیہ شامل ہیں۔ اطلاعات کے مطابق فانبلیہ نے اپنے استعفیٰ میں اسٹارمر کو بتایا کہ عوام اب اس بات پر یقین نہیں رکھتے کہ وہ کوئی حقیقی تبدیلی لا سکتے ہیں۔

تاہم اسٹارمر کے اتحادیوں نے قیادت کے خلاف بغاوت کی خبروں کو کم کرنے کی کوشش کی ہے۔ یورپ کے وزیر نک تھامس سیمنڈز نے کہا کہ پارٹی کے اندر کوئی بھی متبادل امیدوار اتنی حمایت حاصل نہیں کر سکا کہ وہ باضابطہ طور پر وزیر اعظم کو چیلنج کر سکے۔

یہ سیاسی غیر یقینی صورتحال پارلیمنٹ کے رسمی افتتاح سے قبل سامنے آئی ہے، جہاں بادشاہ چارلس سوم حکومت کے قانون سازی پروگرام کا اعلان کریں گے، جو اسٹارمر کی حکومت نے تیار کیا ہے۔

حکومت اقتصادی اصلاحات، عوامی خدمات اور قومی سلامتی سے متعلق 35 سے زائد بل اور مسودہ قوانین متعارف کرانے کا ارادہ رکھتی ہے۔

اگرچہ اسٹارمر اقتدار میں رہنے کے لیے پُرعزم دکھائی دیتے ہیں، لیکن ان کی قیادت کے گرد بڑھتی غیر یقینی صورتحال نے حکومت کے مستقبل پر سوالات کھڑے کر دیے ہیں اور لیبر پارٹی کے استحکام پر بھی خدشات پیدا کر دیے ہیں، خاص طور پر انتخابی فتح کے دو سال سے بھی کم عرصے بعد۔