ای رکشاؤں کو ریموٹ سے بند کرنے والی چینی ایپس پر بھارتی حکومت کا بڑا ایکشن

بھارتی حکومت نے ای رکشاؤں کو ریموٹ کے ذریعے بند کرنے کی صلاحیت رکھنے والی دو چینی ایپس BAT-BMS کو ایپ اسٹورز سے ہٹانے کی ہدایت جاری کر دی ہے۔ حکومت کا کہنا ہے کہ یہ ایپس سائبر سکیورٹی اور عوامی سلامتی کے لیے خطرہ بن سکتی ہیں۔

آئی ٹی سیکریٹری ایس کرشنن نے اس کارروائی کی تصدیق کرتے ہوئے کہا کہ حکومت کو ان ایپس کے بارے میں معلومات ملنے کے بعد فوری طور پر انہیں ایپ اسٹورز سے ہٹانے کی کارروائی کی گئی۔ انہوں نے سی آئی آئی سائبر سکیورٹی سمٹ کے دوران کہا کہ حکومت ایپ اسٹور آپریٹرز کے ساتھ مسلسل رابطے میں رہے گی تاکہ مستقبل میں اس نوعیت کی خطرناک ایپس دستیاب نہ ہوں۔

یہ معاملہ اس وقت سامنے آیا جب رپورٹس میں دعویٰ کیا گیا کہ BAT-BMS سسٹم سے منسلک بعض ای رکشاؤں کو موبائل ایپ کے ذریعے دور سے بند کیا جا سکتا ہے۔ اس انکشاف کے بعد انٹرنیٹ سے منسلک گاڑیوں کے مینجمنٹ سسٹمز اور ان کے ممکنہ غلط استعمال کے حوالے سے سکیورٹی خدشات بڑھ گئے۔

حکومت نے واضح کیا ہے کہ وہ ڈیجیٹل پلیٹ فارمز کی مسلسل نگرانی کرے گی اور ایسی کسی بھی ایپ کے خلاف سخت کارروائی کرے گی جو قومی سائبر سکیورٹی یا عوامی مفاد کے لیے خطرہ ثابت ہو سکتی ہو۔