رام مندر عطیات گنتی کے قواعد سخت، نگرانی بڑھ گئی

ایودھیا کے رام مندر میں عطیات کی مبینہ چوری کا معاملہ سامنے آنے اور ایس آئی ٹی کی تحقیقات جاری رہنے کے درمیان مندر انتظامیہ نے عطیات کی گنتی اور نقد رقم کے انتظام سے متعلق قواعد میں اہم تبدیلیاں کی ہیں۔

یاتری سہولت مرکز میں قائم خفیہ گنتی کمرے کے سی سی ٹی وی کیمروں کے لیے اب ایک الگ کنٹرول روم قائم کیا گیا ہے۔ اس کنٹرول روم تک پولیس کو بھی رسائی دی گئی ہے تاکہ نگرانی کے نظام کو مزید مضبوط بنایا جا سکے۔

نئے انتظامات کے تحت تمام عطیات کے صندوقوں اور کیش کاؤنٹروں کو مسلسل سی سی ٹی وی نگرانی میں رکھا گیا ہے۔ عطیات نکالنے سے لے کر گنتی کمرے تک منتقل کرنے کے پورے عمل کی ویڈیو ریکارڈنگ کی جائے گی۔

گنتی کے عمل سے وابستہ عملے کے لیے سکیورٹی اقدامات بھی سخت کر دیے گئے ہیں۔ اب داخلے اور اخراج کے وقت تمام اہلکاروں کی مکمل اور لازمی تلاشی لی جائے گی۔

بینک میں رقم جمع کرانے کے طریقہ کار میں بھی تبدیلی کی گئی ہے۔ نقدی کو سیل کرنے سے پہلے تین افراد کی جانب سے کراس چیک کیا جائے گا اور ان کے دستخط لیے جائیں گے۔ بینک میں جمع کراتے وقت بھی رقم کا دوبارہ ملان کیا جائے گا۔

ذرائع کے مطابق ایس آئی ٹی تحقیقات کے دوران مالی شفافیت اور نگرانی کے نظام میں متعدد خامیاں سامنے آئی تھیں، جس کے بعد یہ اصلاحات نافذ کی گئی ہیں۔

ادھر گنتی کے عمل سے وابستہ ٹرسٹ، بینک اور ایجنسی کے بعض اہلکاروں کو تبدیل کیے جانے کی بھی اطلاعات ہیں، تاہم اس کی سرکاری تصدیق ابھی نہیں ہوئی۔ توقع ہے کہ ایس آئی ٹی رپورٹ کے بعد مزید فیصلے کیے جائیں گے۔