ہریانہ کے ایم ایل اے کو دوبارہ جان سے مارنے کی دھمکی، 5 کروڑ روپے بھتہ طلب

ہریانہ کے ضلع روہتک کے مہم حلقے سے کانگریس کے ایم ایل اے بلرام دانگی کو ایک بار پھر جان سے مارنے کی دھمکی دی گئی ہے۔ انہیں ایک غیر ملکی نمبر سے واٹس ایپ پر پیغام بھیج کر 5 کروڑ روپے بھتے کا مطالبہ کیا گیا ہے۔

دھمکی آمیز پیغام میں لکھا گیا، "ابھی تو تمہارے دفتر کے شیشوں پر گولیاں چلائی ہیں، اب 5 کروڑ روپے تیار رکھو، ورنہ اگلی گولی تم پر چلے گی۔" پیغام بھیجنے والے نے خود کو سُمیت عرف چھوٹو سمانیا بتایا ہے۔

یہ دھمکی اس واقعے کے چند دن بعد سامنے آئی ہے جب گزشتہ ہفتے نامعلوم حملہ آوروں نے مہم میں واقع ایم ایل اے کے دفتر پر فائرنگ کی تھی۔ پولیس کے مطابق حملہ آوروں نے چار سے پانچ راؤنڈ فائر کیے، جس سے دفتر کے شیشے ٹوٹ گئے۔

واقعے کے بعد پولیس نے مقدمہ درج کرکے تحقیقات شروع کر دی ہیں۔ واٹس ایپ پیغام بھیجنے والے غیر ملکی نمبر اور ملزمان کی شناخت کی جا رہی ہے، جبکہ ایم ایل اے کی سکیورٹی بھی مزید سخت کر دی گئی ہے۔