کولوراڈو میں بڑا سیاسی اپ سیٹ، میلاٹ کیروس نے 15 بار کی رکن کانگریس کو شکست دے دی

امریکا کی ریاست کولوراڈو میں ڈیموکریٹک پارٹی کے پرائمری انتخابات میں بڑا سیاسی اپ سیٹ دیکھنے میں آیا، جہاں 29 سالہ ڈیموکریٹک سوشلسٹ رہنما میلاٹ کیروس نے 15 بار منتخب ہونے والی رکن کانگریس ڈیانا ڈیگیٹے کو شکست دے دی۔ تقریباً 78 فیصد ووٹوں کی گنتی کے بعد کیروس کو سات ہزار کے قریب ووٹوں کی برتری حاصل ہوئی، جس کے بعد متعدد امریکی میڈیا اداروں نے ان کی کامیابی کی پیش گوئی کر دی۔

ایتھوپیا میں پیدا ہونے والی اور بچپن میں امریکا منتقل ہونے والی میلاٹ کیروس نے اپنی انتخابی مہم میں ترقی پسند پالیسیوں اور ڈیموکریٹک قیادت پر تنقید کو نمایاں رکھا۔ انہوں نے غزہ جنگ کے دوران اسرائیل کی حمایت کرنے والے ڈیموکریٹ رہنماؤں پر کھل کر تنقید کی اور اسرائیلی کارروائیوں کو نسل کشی قرار دیا۔

اسرائیل اور فلسطین سے متعلق ایک تنقیدی سوشل میڈیا پوسٹ ہٹانے سے انکار کرنے پر انہیں اپنی قانونی ملازمت بھی چھوڑنی پڑی تھی۔ ان کے واضح مؤقف اور نوجوان ووٹروں کی حمایت نے انہیں انتخابی مہم میں نمایاں برتری دلائی۔

میلاٹ کیروس کی کامیابی کو امریکا میں ترقی پسند اور ڈیموکریٹک سوشلسٹ سیاست کے بڑھتے ہوئے اثرورسوخ کی ایک اور مثال قرار دیا جا رہا ہے۔ اس سے قبل نیویارک میں بھی اسی نظریے سے وابستہ کئی امیدوار پرائمری انتخابات میں کامیابی حاصل کر چکے ہیں۔

کولوراڈو کا یہ حلقہ روایتی طور پر ڈیموکریٹک پارٹی کا مضبوط گڑھ سمجھا جاتا ہے، جس کی وجہ سے نومبر کے عام انتخابات میں بھی کیروس کو مضبوط امیدوار تصور کیا جا رہا ہے۔

اسی روز کولوراڈو کے اٹارنی جنرل فل وائزر نے گورنر کے لیے ڈیموکریٹک نامزدگی حاصل کی، جبکہ ریاستی نمائندے مینی روٹینیل نے بھی اہم کانگریسی نشست کے لیے پارٹی ٹکٹ اپنے نام کر لیا۔ سیاسی مبصرین کے مطابق یہ نتائج ڈیموکریٹک پارٹی کے اندر ترقی پسند دھڑے کی بڑھتی ہوئی طاقت کی عکاسی کرتے ہیں۔