خواتین فٹبال کوچ پر کھلاڑیوں کی خفیہ ویڈیوز بنانے پر تاحیات پابندی

یورپی فٹبال حکام نے چیک خواتین فٹبال کے سابق کوچ پیٹر ولاخوفسکی پر کھلاڑیوں کے ڈریسنگ روم میں خفیہ ویڈیوز بنانے کا جرم ثابت ہونے کے بعد تاحیات پابندی عائد کر دی ہے۔

یوئیفا نے اپنے سرکاری بیان میں کہا کہ ڈسپلنری باڈی نے سنگین بدسلوکی کے الزامات کی تحقیقات مکمل ہونے کے بعد ولاخوفسکی کو زندگی بھر ہر قسم کی فٹبال سرگرمیوں سے معطل کر دیا ہے۔

حکام نے یہ بھی مطالبہ کیا کہ اس پابندی کو عالمی سطح پر نافذ کیا جائے اور چیک فٹبال فیڈریشن ان کا کوچنگ لائسنس مستقل طور پر منسوخ کرے۔

چیک میڈیا رپورٹس کے مطابق ولاخوفسکی کو مئی 2025 میں مجرم قرار دیا گیا تھا اور انہیں ایک سال قید کی معطل سزا کے ساتھ پانچ سالہ ملکی کوچنگ پابندی بھی دی گئی تھی۔

یہ معاملہ ایف سی سلوواکو کلب کی خواتین کھلاڑیوں کی خفیہ ریکارڈنگ سے متعلق تھا، جن میں کم عمر کھلاڑیاں بھی شامل تھیں۔ رپورٹس کے مطابق سب سے کم عمر متاثرہ کھلاڑی کی عمر 17 سال تھی۔

مقامی عدالتی دستاویزات کے مطابق ولاخوفسکی نے عدالت میں اپنے اقدامات کا اعتراف کرتے ہوئے افسوس کا اظہار بھی کیا۔

وہ اس سے قبل چیک خواتین انڈر 19 قومی ٹیم کے ساتھ بھی کام کر چکے تھے، جس کے بعد خواتین فٹبال میں کھلاڑیوں کی حفاظت اور نگرانی کے نظام پر مزید سوالات اٹھنے لگے ہیں۔

ایف سی سلوواکو نے کہا کہ الزامات سامنے آنے کے فوراً بعد کلب نے کوچ سے تمام تعلقات ختم کر لیے تھے اور تحقیقات میں مکمل تعاون کیا۔

کلب کے مطابق اس واقعے نے متاثرہ کھلاڑیوں کو شدید ذہنی صدمہ پہنچایا جبکہ ادارے نے اس بات پر زور دیا کہ کھلاڑیوں کا تحفظ ان کی اولین ترجیح ہے۔

عالمی فٹبال کھلاڑیوں کی تنظیم FIFPRO نے بھی فیصلے کا خیر مقدم کرتے ہوئے کہا کہ یہ سزا واضح پیغام دیتی ہے کہ کھلاڑیوں کی پرائیویسی کی خلاف ورزی اور بدسلوکی کی فٹبال میں کوئی جگہ نہیں۔