دیوریا کے مندر میں چندے کے تنازع پر تصادم، بزرگ پجاری پر لاٹھیوں سے حملہ; 6 گرفتار

دیوریا: اتر پردیش کے ضلع دیوریا کے مشہور بابا مہندرناتھ شیو مندر میں چندے کی تقسیم اور پوجا پاٹ کے حقوق کو لے کر پجاریوں کے دو گروپوں کے درمیان شدید جھڑپ ہو گئی۔

سوشل میڈیا پر وائرل ہونے والی ویڈیو میں چند افراد ایک بزرگ پجاری کو لاٹھیوں سے مارتے ہوئے دکھائی دے رہے ہیں۔ یہ واقعہ مدن پور تھانہ علاقے میں واقع مندر کے احاطے میں پیش آیا۔

اطلاعات کے مطابق، چندے اور مذہبی رسومات کے اختیارات پر پہلے زبانی تکرار ہوئی، جو بعد میں پرتشدد تصادم میں تبدیل ہو گئی۔ مندر میں موجود عقیدت مندوں اور مقامی لوگوں نے مداخلت کر کے دونوں فریقوں کو الگ کیا۔

پولیس نے دونوں فریقوں کی شکایات کی بنیاد پر مقدمہ درج کر لیا ہے۔ ردرپور کے سرکل آفیسر ستیندر رائے کے مطابق 6 ملزمان کو گرفتار کر لیا گیا ہے جبکہ مزید قانونی کارروائی جاری ہے۔ علاقے میں صورتحال قابو میں ہے۔