غزہ کے بچوں کے پیغامات ماؤنٹ ایورسٹ کی چوٹی تک پہنچ گئے

کوہ پیماؤں کی ایک ٹیم غزہ کے فلسطینی بچوں کے ہاتھوں سے لکھے گئے پیغامات اور دستخطوں سے بھری ایک پتنگ کو ماؤنٹ ایورسٹ کی چوٹی تک لے گئی، جو محصور فلسطینی عوام کے ساتھ امید، استقامت اور عالمی یکجہتی کی علامت بن گئی۔

اردن سے تعلق رکھنے والے فلسطینی کوہ پیما مصطفیٰ سلامہ کے مطابق یہ مہم جمعرات کو مقامی وقت کے مطابق صبح 10 بج کر 48 منٹ پر دنیا کی بلند ترین چوٹی تک پہنچی۔

انہوں نے یہ مشن غزہ میں جاری انسانی بحران کی جانب عالمی توجہ مبذول کرانے کے لیے شروع کیا تھا۔

اطالوی مہم جو اور فلم ساز لیونارڈو آویزیانو کی قیادت میں نیپالی شیرپا ٹیم نے شدید موسم اور انتہائی بلندی کے خطرناک حالات کے باوجود کئی دنوں کی دشوار چڑھائی کے بعد پتنگ کو کامیابی سے چوٹی تک پہنچایا۔

مصطفیٰ سلامہ خود فراسٹ بائٹ اور ہاتھ میں خون جمنے کے باعث ایورسٹ بیس کیمپ میں موجود رہے، تاہم انہوں نے کہا کہ اس مشن کا مقصد غزہ کے بچوں کی آواز اور خوابوں کو “دنیا کی چھت” تک پہنچانا تھا۔

56 سالہ کوہ پیما نے اس مہم کے ذریعے غزہ میں متاثرہ بچوں کے لیے ایک کروڑ ڈالر کی طبی امداد جمع کرنے کا ہدف بھی رکھا ہے۔

چوٹی سر کرنے کے بعد جاری اپنے جذباتی پیغام میں سلامہ نے اس لمحے کو امید اور انسانیت کی فتح قرار دیا۔

انہوں نے کہا، “غزہ کے ملبے اور درد سے دنیا کی بلند ترین چوٹی تک، ایک خواب نے مرنے سے انکار کر دیا۔”

انہوں نے شیرپا ٹیم اور لیونارڈو آویزیانو کو خراج تحسین پیش کرتے ہوئے کہا کہ انہوں نے ایورسٹ کے خطرناک “ڈیتھ زون” سے گزر کر اس علامتی پتنگ کو چوٹی تک پہنچانے کے لیے اپنی جانوں کو خطرے میں ڈالا، جہاں آکسیجن کی سطح جان لیوا حد تک کم ہو جاتی ہے۔

سلامہ نے کہا کہ یہ مشن ان کے لیے ذاتی حیثیت بھی رکھتا ہے کیونکہ انہوں نے خود ایک پناہ گزین کیمپ میں زندگی گزاری ہے اور حالیہ عرصے میں بے گھر فلسطینی بچوں سے ملاقاتیں کی ہیں۔

ان کے مطابق یہ مہم صرف ایک پہاڑ سر کرنے کے بارے میں نہیں تھی بلکہ دنیا کو فلسطینی بچوں کی کہانی سنانے اور یہ ثابت کرنے کے لیے تھی کہ امید تاریک ترین حالات میں بھی زندہ رہ سکتی ہے۔

دنیا بھر میں “ایکسپلوررز سلیم” چیلنج مکمل کرنے والے کوہ پیما کے طور پر معروف سلامہ نے کہا کہ فلسطینی عوام کی استقامت اور اپنی سرزمین پر قائم رہنے کے عزم نے انہیں ہمیشہ متاثر کیا ہے۔

مشن مکمل ہونے کے بعد ٹیم اب بحفاظت ماؤنٹ ایورسٹ سے واپسی پر توجہ دے رہی ہے۔