سمستی پور میں گینگ وار، دو نوجوان گولی مار کر قتل

بہار کے ضلع سمستی پور کے ناماپور گاؤں میں دو نوجوانوں کو گولی مار کر قتل کر دیا گیا، جس کے بعد علاقے میں خوف و ہراس پھیل گیا۔

پولیس کے مطابق مقتولین کی شناخت پربھات چودھری اور سنی کمار کے طور پر ہوئی ہے۔ ابتدائی اطلاعات کے مطابق دونوں کو فون کر کے بلایا گیا تھا، جہاں پہلے سے گھات لگائے حملہ آوروں نے ان پر فائرنگ کر دی۔

پربھات چودھری موقع پر ہی ہلاک ہو گئے، جبکہ جان بچا کر بھاگنے کی کوشش کرنے والے سنی کمار بھی گولی لگنے سے زخمی ہوئے اور اسپتال لے جاتے ہوئے راستے میں دم توڑ گئے۔

پولیس نے جائے وقوعہ سے متعدد خالی کارتوس اور لوڈڈ میگزین برآمد کیے ہیں۔ فرانزک ٹیمیں بھی شواہد جمع کرنے میں مصروف ہیں۔

سینئر پولیس افسران نے موقع کا معائنہ کیا ہے اور گینگ وار، ذاتی دشمنی سمیت تمام ممکنہ پہلوؤں سے تحقیقات جاری ہیں۔

پولیس کے مطابق پربھات چودھری کے خلاف پہلے سے قتل، شراب اسمگلنگ اور آرمز ایکٹ کے تحت کئی مقدمات درج تھے۔ ملزمان کی گرفتاری کے لیے چھاپے مارے جا رہے ہیں۔